Биз нега қариймиз?
Қариш жараёни нимага боғлиқлигини биласизми?
Ўтказилган сўнгги тадқиқотлар натижалари шуни кўрсатадики, организмда ёмон бактерияларнинг кўпайиши қариш ва жисмоний ҳолат ёмонлашишига олиб келади.
Инсон ичаклари мураккаб экотизим бўлиб, унда миллиардлаб микроорганизмлар яшайди. Улар эса ўз навбатида саломатлигимиз учун жавоб беради.
Developmental Cognitive Neuroscience журналида чоп этилган хулосаларга кўра, ичаклардаги микроорганизмлар хилмахиллиги нафақат жисмоний ҳолатга, балки қариш тезлигига ҳам таъсир қилади. Тажриба Венгрия спорт фанлари университети томонидан ўтказилган.
Унинг етакчи муаллифи, профессор Жолт Радакнинг сўзларига кўра, бу синов пробиотиклардан саломатлик ва узоқ умр кўришда фойдаланишнинг янги имкониятларини очади.
У ўз жамоаси билан ичак микрофлораси ҳамда инсоннинг биологик ёши ўртасидаги алоқани тадқиқ қилди. Тажрибада 80 нафар ҳаваскор эшкакчилар қатнашган. Тадқиқот доирасида ҳар бир қатнашчи эпигенетик маркерлар синовидан ўтган.
Эпигенетик маркер - ўзига хос ДНК ўтказувчиси бўлиб, у организм ҳужайраларининг ривожланиши ва атроф-муҳитга реакциясида муҳим роль ўйнайди.
Ҳужайралар сифатига ҳаёт тарзи, озиқланиш, атроф-муҳит таъсири каби бир неча омил таъсир қилади. Охир-оқибатда бу саломатлик ҳолати ва қаришга ўз таъсирини ўтказади.
Олимлар яллиғланиш жараёнини чақирувчи бактериялар қаришни тезлаштиришини аниқлади.
Тез қариш эса сиз биологик ёшингиздан катта эканингизни билдиради. Тажриба қатнашчилари орасида биологик ёши меъёрда бўлганлар ичагида фойдали бактериялар кўп экани аниқланган. Аксинча ҳолларда эса қатнашчи фитнес-синовларда паст натижа кўрсатган.
Олинган натижалар ичак бактериялари ва саломатлик ўртасидаги узвий боғлиқликни кўрсатиб берди. Соғлом овқатланиш эса фойдали бактериялар кўпайишига сабабдир.
Айни пайтда олимлар гуруҳи такрорий тажриба ўтказишни режалаштирмоқда. Якуний хулосалар 2024 йилда эълон қилиниши кутилмоқда.
