Биринчи хонимлар Хитой санъат ва ҳунармандчилик музейида бўлди
Айни вақтда Хитой пойтахти Пекин шаҳрида “Бир макон, бир йўл” учинчи халқаро форуми ўтказилмоқда.
Бугун, 18 октябрь куни Хитой пойтахти Пекин шаҳрида бўлиб ўтаётган “Бир макон, бир йўл” учинчи халқаро форуми доирасида саммитга келган делегациялар раҳбарларининг рафиқалари иштирокидаги тадбирлар ҳам бўлиб ўтди.
Ўзбекистон Республикаси Президентининг рафиқаси Зироат Мирзиёева Хитой Халқ Республикаси Раисининг рафиқаси Пен Лиюан ҳамроҳлигида ҳамда бошқа делегациялар раҳбарларининг рафиқалари билан биргаликда Хитой санъат ва ҳунармандчилик миллий музейига ташриф буюрди.
Президентимизнинг рафиқаси Зироат Мирзиёева биринчи хонимлар билан бирга музейдаги экспонатларни кўздан кечирди. Уларга Хитой ҳунармандчилиги тарихи, буюмларда ифодаланган нақшлар ва рамзлар ҳақида сўзлаб берилди.
Шундан сўнг хонимлар Хитой халқ операси намуналаридан иборат концерт дастурини томоша қилишди. Унда табиат гўзаллиги, тинчлик ва эзгулик, халқлар ўртасидаги дўстлик туйғулари нафис куй ва рақслар уйғунлигида ифодаланди. Биринчи хонимлар концерт ижрочилари билан бирга суратларга тушди.
