Олтин куз манзаралари
Октябрь ойини кузнинг ҳақиқий гўзаллигини жамлаган давр дейиш мумкин. Айнан шу вақтда дарахтлар турли-туман рангларга кирган, аммо ҳали барглар бутунлай тўкилиб улгурмаган бўлади.
Октябрь ойини кузнинг ҳақиқий гўзаллигини жамлаган давр дейиш мумкин. Айнан шу вақтда дарахтлар турли-туман рангларга кирган, аммо ҳали барглар бутунлай тўкилиб улгурмаган бўлади. Кузги фотосессиялар ёки шунчаки мароқли дам олиш учун табиат қўйнига боришнинг айни вақти.
Айниқса бу даврда салқин ҳавода иссиқ шўрва ичиб кино томоша қилишнинг ҳам завқи ўзгача.
Бугун биз сизга кейинги саёҳатларга илҳом бериш учун Европанинг энг гўзал кузги манзараларини тайёрлаганмиз. Уларни томоша қила туриб бир онга бўлсада, ўша эртакнамо атмосферага тушиб қолгандай бўласиз.
1. Блед кўли, Словения.
Блед кўлидан тоғларни томоша қилганда дунёдаги энг чиройли манзарани кўриш мумкин. Бу Словениядаги ягона табиий оролдир. Кўл атрофини 1,5 соатда айланиб чиқиш мумкин. Сузиш мумкин бўлмасада, у ерга борганлар қайиқ ижарага олиб, сув ҳавзасида айланиши мумкин. Кўлдан туриб олинган расмлар Instagram ижтимоий тармоғида жуда машҳур.
2. Кўллар ўлкаси, Англия
Кўллар ўлкаси жуда кўплаб романтик шоирларни илҳомлантирган. Улар орасида Сэмюэл Тейлордан тортиб Уильям Вордсвортгача бор. Шимолий Англиядаги мазкур нуқта 2017 йилдан бери ЮНЕСКО бутунжаҳон мероси рўйхатида. Бу ерга эрта тонгдан бориб шишадек тиниқ кўл манзараларини томоша қилиш мумкин.
3. Пертшир, Шотландия
Саёҳатсеварлар Шотландиядагидек чиройли куз бошқа ерларда бўлмаслигини айтади. Пертшир графлигида эса Гиннес рекордлар китобига киритилган жонли девор мавжуд. У дунёдаги энг баланд жонли девор сифатида қайд этилган. Маҳаллий ўрмон Эрмитажи эса кузда тилла ва оловранг тусга киради. Қадимий ёғоч уйчалар ва шаршаралар эса манзарани тўлдириб туради.
4. Нойшванштайн қасри, Бавария, Германия
"Реал ҳаётдаги эртакнамо қасрлар" деб қидирувга берсангиз, Нойшванштайн қасри биринчилардан бўлиб чиқади. Дисней мультфильмларидагидек минорали қаср тепаликлар билан ўралган. Бавария Альп тоғларида жойлашган мазкур сарой қирол Людвиг II учун XIX аср охирида қурилган. Ҳозир эса фақат экскурсиялар учун очиқ.
5. Трансильвания, Руминия
Трансильвания номи кўпчиликнинг ёдига вампирлар ва готика услуби архитектурани солиши мумкин. Аммо бундан ташқари мазкур нуқта кузги манзаралардан баҳраманд бўлиш учун ҳам айни муддао. Масалан, Мочиар ўрмонида сайр, тоққа чиқиш каби машғулотлар кунингиз мароқли ўтишини таъминлайди.
6. Луара водийси, Франция
Ўзининг шароби билан машҳур Франция Луараси кузги манзаралари билан ҳам сайёҳларни жалб қилади. Бу вақтда узум далалари тўқ қизил ва алвон тусга киради. Ўрта асрларга тегишли Шомон-сюр-Луар саройига қовоқ, бодринг ва бошқа сабзавотлар олиб келинади. Бу ерда халқаро боғ фестивали ўтказилади.
7. Лапландия, Финляндия
Лапландия одатда қиш ва Янги йил билан боғланади. Аммо кузда ҳам бу ер сайёҳлар билан қайнаётган бўлади. Бу шимол ёғдуси мавсумидир. Бундан ташқари, провинциянинг асосий шаҳри бўлган Рованиемидаги ўрмонлар эртакнамо манзара касб этади. Аммо ҳарорат -2 даражага тушиб кетади.
