2 миллион аҳолини тадбиркорликка жалб қилиш бўйича янги тизим жорий этилади
Хўш, бунга қандай эришилади?
Сўнгги йилларда мамлакатимизда тадбиркорлик фаолиятини енгиллаштириш ва уни рағбатлантириш давлатнинг асосий вазифаларидан бирига айлантирилиб ҳукумат томонидан тадбиркорликни ривожлантиришга қаратилган қонун, қарор, фармон ва бошқа турдаги норматив-ҳуқуқий ҳужжатлар ишлаб чиқилганлигини ОАВда кўп эшитганмиз.
Мазкур йўналишдаги ишларни жадаллаштириш мақсадида, ҳамда жорий йил 7 ноябрь куни Ўзбекистон Республикаси Президенти иштирокида ўтказилган тақдимотда давлат раҳбари томонидан берилган топшириқлар ижросини таъминлаш борасида аҳолини кичик ва ўрта бизнесга кенг жалб қилишга қаратилган Ўзбекистон Республикаси Президентининг қарори қабул қилинди.
Қарорнинг асосий мақсади – унинг номида кўрсатилганидек — аҳолини кичик ва ўрта бизнесга жалб қилишдир.
Хўш ушбу мақсадларга қандай эришилади?
Мазкур қарор лойиҳасида аҳолини тадбиркорликка жалб қилишнинг қуйидаги тартиби белгиланмоқда:
а) кичик ва ўрта тадбиркорларга “ягона дарча” тамойили асосида молиявий хизмат кўрсатиш учун кичик бизнесга кўмаклашиш марказлари ва Тадбиркорликни ривожлантириш компанияси Савдо-саноат палатаси ҳудудий бошқармалари биноларига жойлаштирилмоқда;
б) Савдо-саноат палатаси (Д.Ваҳобов), Бизнес-омбудсман (Д.Қосимов), Маҳаллабай ишлаш агентлиги (М.Убайдуллаев) ҳар ҳафта:
- маҳаллаларга чиққан ҳолда аҳоли ва тадбиркорларга кичик ва ўрта бизнес учун давлат томонидан яратилган молиявий имкониятларни тушунтириб боради;
- кичик бизнесга кўмаклашиш марказларида аҳоли ва тадбиркорларни бизнес кўникмаларига ўқитади;
- кичик бизнесга кўмаклашиш марказлари ва Тадбиркорликни ривожлантириш компанияси билан бирга салоҳиятли тадбиркорларни аниқлаб, уларнинг лойиҳаларини амалга оширишга кўмаклашади.
Шу билан биргаликда Иқтисодиёт ва молия вазирлигига бир қатор ташкилотлар билан биргаликда бир ҳафта муддатда давлат дастурларида назарда тутилган имкониятлар ва уларда иштирок этиш шартлари тўғрисида тақдимот материаллари ва видеороликлардан иборат намунавий қўлланмалар тайёрлаб, Республика комиссияси аъзолари ва ҳудудий комиссияларга етказилиши ҳамда электрон платформаларда жойлаштирилиши юклатилган.
Кичик ва ўрта бизнес мамлакатнинг иқтисодий ривожланишида муҳим роль ўйнайди ва унинг ривожланишининг ижобий томонлари бу:
1) Иқтисодий ўсишни рағбатлантирилиши: кичик ва ўрта бизнес янги иш ўринларини яратишга ва умумий бандликни оширишга ҳисса қўшади, бу эса иқтисодий ўсишга ёрдам беради.
2) Инновацион ва технологик тараққиёт: кичик ва ўрта бизнес инновация ва технологик тараққиётнинг “двигатели” сифатида хизмат қилади. Улар кўпинча янги ғоялар, ишланмалар ва технологиялар манбаи ҳисобланади.
3) Камбағалликни ва тенгсизликни қисқартирилиши: кичик ва ўрта бизнеснинг ривожланиши аҳоли даромадларини ошириш ва камбағалликни қисқартиришга ёрдам беради.
4) Ҳудудларнинг ривожланиши: кичик ва ўрта бизнес субъектлари ҳудудларнинг, айниқса кичик шаҳарлар ва қишлоқ жойларнинг мўътадил ривожланишига ҳисса қўшади. Ушбу ҳудудларда кичик ва ўрта бизнесни ривожлантириш ва уни қўллаб-қувватлаш инвестицияларни жалб қилиши ва янги иш ўринлари яратиши мумкин.
5) Рақобатни рағбатлантирилиши: кичик ва ўрта бизнес бозорда рақобатни кучайтиришга ўз ҳиссасини қўшади. Мисол тариқасида кичик ва ўрта бизнес субъектлари ва катта тадбиркорлик субъектлари ўртасидаги рақобат истеъмолчилар учун сифатлироқ ва арзонроқ бўлган товар ва хизматларни шакллантиришга хизмат қилади.
