Аргентинага янги президент сайланди
Янги президент 10 декабрда расман ўз лавозимига киришади.
Президентлик сайловининг иккинчи босқичида либертар иқтисодчи Милей деярли 56 фоиз овоз олиб, рақиби Иқтисодиёт вазири Серхио Массадан устун келди. Милей 10 декабрда расман ўз лавозимига киришади.
Масса мағлубиятни тан олганидан сўнг, Милей Буэнос-Айресдаги тарафдорларига мурожаат қилди.
"Бугун Аргентинанинг тикланиши бошланади, бу тарихий кеча", — дея унинг сўзларини келтиради РБК.
Аргентинанинг янги президентини ғалабаси кўпчилик, хусусан, Доналд Трамп (Милей кўпинча АҚШнинг 45-президентига қиёсланади) ҳам табриклади:
"Бутун дунё сайловни томоша қиларди! Мен сиз билан жуда фахрланаман. Сиз ўз мамлакатингизни яна буюк Аргентинага айлантирасиз", — деб ёзди Трамп ўзининг Truth ижтимоий тармоғида.
Милей ўзининг сайловолди дастурида миллий валютадан воз кечиб, Америка долларига ўтиш, Марказий банк ва бир қатор вазирликларни тугатишни назарда тутган. Милей, шунингдек, абортни тақиқлаш бўйича референдум ўтказишни ҳам режалаштирган.
