АҚШ ўт очишни тўхтатиш бўйича резолюцияга вето қўйди
Америка вакилига кўра, ҲАМАС Исроил учун хавф туғдиришда давом этмоқда.
Кеча, 8 декабрь куни Америка Қўшма Штатлари БМТ Хавфсизлик кенгашида Ғазо секторида зудлик билан ўт очишни тўхтатишга чақирувчи резолюцияга вето қўйди. Қўшма Штатлар Бирлашган Араб Амирликлари делегацияси томонидан овозга қўйилган резолюцияга қарши овоз берган Хавфсизлик Кенгашининг ягона аъзоси бўлди.
Яна 13 давлат, жумладан, Хавфсизлик Кенгашининг доимий аъзолари Россия, Хитой ва Франция ҳам резолюцияни ёқлаб овоз берди. Буюк Британия эса бетараф қолди. Исроил ва унинг асосий иттифоқчиси Қўшма Штатлар зудлик билан ўт очишни тўхтатишга қарши, чунки улар бу ҲАМАСга фойда келтириши ва ҳар икки давлат террорчи деб ҳисоблаган ташкилотга қайта тўпланиб, кейин Исроилга қарши ҳужумларни давом эттириш имкониятини беришига ишонади.
Америка вакилига кўра, ҲАМАС Исроил учун хавф туғдиришда давом этмоқда ва Ғазо устидан назоратни давом эттирмоқда. Ҳеч бир ҳукумат ўз чегараларида бундай хавфга йўл қўймайди.
