Ўзбекистонда ҳар йили август ойини “Қатағон қурбонларини ёд этиш ойи” сифатида ўтказилиши кутилмоқда
Мирзиёев Тошкентда бўлиб ўтаётган “Жадидлар: миллий ўзлик, истиқлол ва давлатчилик ғоялари” мавзусидаги халқаро илмий конференция иштирокчиларига табрик йўллади.
Президент Шавкат Мирзиёев Тошкент шаҳрида бўлиб ўтаётган “Жадидлар: миллий ўзлик, истиқлол ва давлатчилик ғоялари” мавзусидаги халқаро илмий конференция иштирокчиларига табрик йўллади:
“Барчамизга аёнки, “Тилда, фикрда, ишда бирлик” деган эзгу ғоя билан майдонга чиққан жадид боболаримиз халқларимизни жаҳолат ва қолоқликдан олиб чиқиш, уларни ғафлат ботқоғидан қутқаришнинг асосий йўли – билим ва маърифатда, дунёвий тараққиётни эгаллашда, деб билдилар.
Улар шу йўлда фидойилик кўрсатиб, янги усул мактаблари, театр ва кутубхоналар, нашриётлар очдилар. Жамият аъзоларининг дунёқараши ва турмуш тарзини ўзгартириш мақсадида газета ва журналлар нашр этдилар. Ёшларни илғор давлатларга ўқишга юбордилар. Ўзбекистон Олий суди томонидан 1 минг 30 дан зиёд мустабид тузум қатағонига учраган ватандошларимиз номи оқлангани тарихий адолатни тиклаш йўлидаги янги қадам бўлди.
Ўзбекистонда ҳар йили август ойини “Қатағон қурбонларини ёд этиш ойи” сифатида ўтказилиши кутилмоқда.
“Фидойи ватандошларимиз ва уларнинг авлодлари яшаган ва яшаётган хонадонларга ёдгорлик лавҳалари ўрнатиш, уларнинг ворислари ҳамда яқин кишиларига ҳурмат-эътибор кўрсатиш бўйича чора-тадбирлар белгиланмоқда”, — дейилади президент мурожаатида.
Маҳалла идораларида “Қатағон қурбонлари хотираси бурчаклари” ва “Маҳалла хотира китоблари”ни ташкил этиш, ҳар йили камида 100 нафар қатағон қурбони ҳамда жадидлар ҳаёти ва фаолиятини акс эттирадиган тўплам тайёрлаш режалаштирилган.
