АҚШнинг яна бир штати Трампга сайловларда қатнашишни тақиқлади
Трамп Капитолийга бостириб киришга алоқадорлигини рад этиб келмоқда.
АҚШ собиқ президенти Доналд Трампга Республикачилар партиясининг Мэн штатида бўлиб ўтадиган праймеризида президентликка номзодини қўйиш тақиқланди. Мэн штати давлат котиби Шанна Беллоуз томонидан қабул қилинган ушбу қарор 29 декабр, жума куни штат давлат котиби департаментининг расмий сайтида эълон қилинди.
Беллоуз қарори АҚШ Конституциясига исёнда қатнашган шахсларнинг фуқаролик ёки ҳарбий давлат лавозимларини эгаллашини тақиқловчи 14-тузатишига асосланган. Трамп ўз тарафдорларининг 2021 йил январида Капитолийга бостириб киришига сабаб бўлган ҳаракатларини қўзғатганликда айбланмоқда.
Доналд Трамп сайловолди штаби матбуот котиби Стивен Чжан АҚШ собиқ президенти тарафдорлари Беллоузнинг "даҳшатли" қарорига судда эътироз билдиришини айтган. Аввалроқ Трамп Беллоуздан унинг праймеризларини кўриб чиқишда қатнашмасликни талаб қилганди, чунки у Демократик партиядан собиқ штат сенатори бўлган ва 2021 йил 6 январдаги воқеаларни очиқчасига исён деб атаган, бу эса уни, Оқ уй собиқ раҳбари фикрича, нохолис позицияни эгаллашга ундайди.
Трампга қарши худди шундай даъволар яна бир қанча штатларда ҳам очилган. Ноябрь ойида Миннесота Олий суди собиқ президентнинг сайловда қатнашишини тақиқлашдан бош тортди, Мичиган штатида эса суд Оқ уй собиқ раҳбари сайлов бюллетенида қолиш-қолмаслигини суд тизими эмас, Конгресс ҳал қилиши керак, деган қарорга келди.
Трамп Капитолийга бостириб киришга алоқадорлигини рад этиб келади.
