Япониядаги зилзила қурбонлари сони 30 нафарга етди
Ерости силкинишлари ҳафта давомида давом этиши кутилмоқда.
Японияда рўй берган кучли зилзила оқибатида камида 30 киши ҳалок бўлди, ўнлаб кишилар жароҳатланди. Цунами хавфи даражаси пасайган, бироқ юз мингга яқин япониялик тунни эвакуация марказлари – мактаблар ва спорт залларида ўтказмоқда.
Бош вазир Фумио Кисида сўзларига кўра, айниқса, ғарбий қирғоқ зонаси зарар кўрган. Табиий офат оқибатида жабрланган ҳудудларга олиб борувчи йўллар бузилиб кетгани қутқарув ишларини мураккаблаштирмоқда.
Метеорологларнинг маълумотлари душанба куни эрталабдан бери Японияда 155 та зилзила содир бўлганини кўрсатди. Ерости силкинишлари ҳафта давомида давом этиши кутилмоқда. АҚШ ва Буюк Британия аллақачон офат оқибатларига қарши курашда ёрдам таклиф қилишди. Зилзила оқибатида Исикава префектурасида 200 дан ортиқ уй ёниб кетди. 100 дан ортиқ бинолар қулаб тушди. Вайроналар остида 17 киши қолаётгани айтилмоқда.
