Ғазодаги жанглар яна бир йил давом этиши мумкин
Бу ҳақда Исроил мудофаа расмийлари ва собиқ юқори мартабали разведка зобитлари айтмоқда.
Тhe Guardian нашрининг ёзишича, Исроил мудофаа расмийлари ва собиқ юқори мартабали разведка зобитлари Ғазода жанглар камида яна бир йил давом этишини билдиришган.
Исроил мудофаа кучлари вакили Даниэл Хагарининг маълум қилишича, ҳозирда ҳарбий ҳаракатлар давом этаётган Ғазонинг маркази ва жануби жангарилар жойлашган ер ости туннеллари тармоғига эга.
Хагарининг айтишича, ҳудудни тозалаш учун уч ой вақт кетади, шунинг учун жанглар 2024 йилда ҳам давом этади.
Ҳарбий разведканинг собиқ раҳбари генерал-майор Амос Ядлин ушбу ҳарбий ҳаракатларни 2017 йилда ИШИДга қарши кўпмиллатли коалиция бошчилигида тўққиз ой давом этган кампанияга қиёслади. Бироқ, Ядлиннинг сўзларига кўра, Ғазодаги вазият анча оғир, ЦАХАЛга ҲАМАСни йўқ қилиш учун камида бир йил керак бўлади.
Эслатиб ўтамиз, Тел-Авивдаги юқори мартабали зобитларнинг баёнотлари АҚШ Давлат котиби Энтони Блинкеннинг Яқин Шарққа сафари фонида қилинган эди. Блинкеннинг минтақага ташрифдан кўзланган мақсади можаро янада авж олишининг олдини олишдир.
