БМТ: Украиналиклар гуманитар ёрдам учун 4,2 миллиард долларга муҳтож
Ташкилот ҳисоб-китобларига кўра, 2024 йилда Украинанинг 14,6 миллиондан ортиқ аҳолиси ёки мамлакат аҳолисининг 40 фоизи гуманитар ёрдамга муҳтож бўлади.
БМТ ва ташкилот ҳамкорлари донорлардан 2024 йилда урушдан жабр кўрган Украина аҳолиси, шунингдек, украиналик қочқинлар ва уларни қабул қилувчи мамлакатларни қўллаб-қувватлаш учун 4,2 миллиард доллар ажратишни сўради. Бу ҳақда БМТнинг Гуманитар масалаларни мувофиқлаштириш бошқармаси ва Қочқинлар ишлари бўйича Олий комиссарлиги бошқармаси қўшма баёнотида айтилди.
Умуман олганда, гап Украина ва Европа минтақасидаги 10,8 миллионга яқин одамга ёрдам кўрсатиш ҳақида бормоқда. Мамлакатда қолган 8,5 миллион муҳтож украиналикларга ёрдам бериш учун 3,1 миллиард доллар, хорижий давлатлардаги 2,3 миллион қочқин украиналикларни қўллаб-қувватлаш учун 1,1 миллиард доллар сўралган.
БМТ ҳисоб-китобларига кўра, 2024 йилда Украинанинг 14,6 миллиондан ортиқ аҳолиси ёки мамлакат аҳолисининг 40 фоизи гуманитар ёрдамга муҳтож бўлади. Ҳозирда тахминан 6,3 миллион украиналик мамлакатни тарк этиб, қочқин сифатида яшамоқда.
