Навалнийнинг яна бир адвокатига экстремизм бўйича айблов қўйилди

 

Россиялик мухолифатчи Алексей Навалнийнинг адвокати Олга Михайлова хабар беришича, унга Россия Федерациясида, терговчиларнинг фикрича, сиёсатчи асос солган "экстремистик ҳамжамият"да иштирок этиш бўйича сиртдан айблов қўйилган.

 

"Маълум бўлишича, мен Алексей Навалнийни барча жиноий ва маъмурий ишлар бўйича ҳимоя қилмаганман, Европа судида шикоятларни ютиб олмаганман. Лекин 2011 йилда у яратган экстремистик ҳамжамиятда иштирок этганман", — деб ёзган адвокат ўзининг Facebook саҳифасида.

 

Чет элда бўлган Михайлова сўзларига кўра, унинг иши бўйича терговчилар Навалнийнинг барча ишларида бўлгани каби бир хил — "ақлдан озган бемаънилик ва уйдирма экстремизмни ихтиро қилишнинг усталари", деб тавсифлаган. 

 

2023 йил октябрь ойида мухолифатчини ҳимоя қилган яна уч адвокат — Игор Сергунин, Вадим Кобзев ва Алексей Липцер худди шу айблов билан ҳибсга олинганди. Улар ўз айбларини тан олмаяпти. Тергов маълумотларига кўра, адвокатлар ёрдамида уч йилдан бери қамоқда ўтирган Навалний номи ошкор этилмаган экстремистик ташкилот билан алоқада бўлган. 

 

Михайлова "13 октябрь куни Навалнийнинг барча адвокатларига қарши мисли кўрилмаган ҳужум ҳақида олдиндан билган оператив ходимларга ва Russia Today’га алоҳида салом" етказди. Унинг сўзларига кўра, Михайлова 10 октябрь куни Иорданияга режалаштирилган сафари учун жўнаб кетаётганида, улар уни Москва аэропортида кузатиб борган ва кейин ҳамкасблари ҳибсга олиниши арафасида уни "ҳаммани сотиб, ўзи қочиб кетганликда" айблаган. 

 

"Мен ҳеч қачон ҳеч кимни сотмаганман. Мен ҳеч қачон қочмаганман. Россияда қолишимга ва ўз мижозларимни охиригача ҳимоя қилишимга қатъий ишонганман. Аммо 13 октябрь куни ҳамкасбларим ҳибсга олинганидан кейин қамоққа қайтишдан маъно йўқ. Ҳа, ҳозир мен қизим билан чет давлатдаман, уйимиз йўқ, муаммоларимиз кўп", — деб ёзган Михайлова ва "колонияда эмас, балки озодликда фойдалироқ бўлишга" умид қилишини қўшимча қилди.