UNICEF: Ғазода 17 минг бола ота-онасиз қолди
UNICEF: Ғазода 17 минг бола ота-онасиз қолди Уруш ўчоғида оилалар озиқ-овқат, сув ва бошпанасиз оғир аҳволда ҳаёт кечирмоқда.
Ғазо секторида 17 мингга яқин бола боқувчисиз ёки оиласидан ажралган ҳолда қолмоқда. Бу ҳақда UNICEFнинг Фаластин билан алоқалар бўйича директори Жонатан Крикс Женевада бўлиб ўтган брифингда маълум қилди.
Унинг таъкидлашича, ҳар бир боланинг ўз ҳикояси бор.
Крикс ўтган ҳафта Ғазо секторига қилган ташрифини эслаб, оилалар озиқ-овқат, сув ёки бошпана етишмаслиги туфайли оғир аҳволда қолганини таъкидлади.
“Оилалар ва болалар асосий эҳтиёжларни қондиришда қийналмоқда”, — деган у.
Директорнинг сўзларига кўра, Ғазодаги воқеалар болаларнинг руҳий саломатлигига жиддий таъсир кўрсатган.
“Декабрь ойида биз анклавдаги 500 минг бола психологик ёрдамга муҳтожлигини айтгандик. Ҳозир анклавдаги барча болалар кучли травмаларни бошдан кечирмоқда. Бу ҳолат болаларда ҳар сафар бомба овозини эшитганларида ҳаддан ташқари ташвиш, иштаҳа йўқолиши, ухлай олмаслик, эмоционал зўриқиш ёки ваҳима каби аломатларни бошдан кечиришига сабаб бўлади”, — деди Жонатан Крикс.
