Афғонистонда аномал совуқдан салкам 31 минг чорва нобуд бўлди
“Толибон” расмийлари биргина Балх вилоятида 11 418 бош қорамол нобуд бўлганини айтган.
Афғонистоннинг етти вилояти: Балх, Панжшир, Сарпол, Фарёб, Саманган, Тахар ва Қандаҳорда кучли қор ва совуқ оқибатида 30 минг 858 бош қорамол нобуд бўлган.
Расмийлар транспорт йўлларини қордан тозалаш, вилоятнинг чекка ҳудудларида қолган аҳолига чорва еми ва озиқ-овқат етказиб бериш ҳаракатларини бошлаган.
Панжширда эса кучли қор ёғиши ва совуқ ҳаво туфайли 10 та уй зарар кўрган, 100 бош қорамол нобуд бўлган. Сарпол, Фарёб ва Саманганда йўқотишлар сони камида 12 минг қорамол экани айтилмоқда. Тахарда 1670 бош, Қандаҳорда эса 5670 бош қорамол нобуд бўлган.
“Толибон” табиий офатларга қарши кураш вазирлиги матбуот котиби Жанан Саиқ ўтган 12 кун ичида мамлакатда кучли қор ёғиши ва қаттиқ совуқ туфайли камида 20 киши ҳалок бўлгани ва яна 14 киши жароҳатланганини айтди.
