Футбол бўйича Европа чемпионати учун 11 евролик танга чиқарилди
Ноёб танга 111 111 дона тиражга эга бўлиб, 8 майдан сотувга чиқарилади.
Германиянинг ўнта шаҳрида бўлиб ўтадиган футбол бўйича бўлажак Европа чемпионати нафақат мухлислар, балки коллекционерларни ҳам хурсанд қилади.
Бу йил футбол бўйича Европа чемпионати Германияда 14 июндан 14 июлгача бўлиб ўтади.
Шу муносабат билан Германия ҳукумати тарихда биринчи марта Германия футбол ассоциацияси билан биргаликда эсдалик кумуш танга чиқармоқда. Бир томонда немис бургути, иккинчи томонда турнир финали бўлиб ўтадиган Берлиндаги Олимпия стадионининг томи жойлашган.
Танганинг оғирлиги 14 грамм, диаметри эса 30 миллиметрга тенг. Номинал қиймати – 11 евро – футбол жамоасидаги ўйинчилар сонига тенг.
У 111 111 дона тиражга эга бўлиб, 8 майдан сотувга чиқарилади. Аммо ҳозироқ олдиндан буюртма бериш мумкин.
