АҚШ Россияни терактлар ҳақида огоҳлантирган

АҚШ маълумотларига кўра, "Crocus City Hall"даги теракт ИШИДнинг Хуросон бўлими томонидан амалга оширилган.

 

"Америкада ИШИДнинг Россиядаги фаоллашуви ҳақида олдиндан разведка маълумотлари мавжуд эди. Биз, тахминан, ўтган йилнинг октябридан буён бу тўғрисида маълумот олаётгандик", — дейди америкалик амалдорлардан бири The New York Times газетасига берган интервьюсида.

 

"АҚШнинг Москвадаги элчихонаси 7 март куни терактлар эҳтимоли ҳақида гапирганди, бу АҚШ разведкасининг Россиядаги ИШИД фаолияти ҳақидаги маълумотларига асосланган эди", — дея тасдиқлади Washington Post манбалари. Америка матбуотига кўра, Қўшма Штатлар, ушбу баёнотлардан ташқари, Россия расмийларини шахсан ҳам огоҳлантирган.

 

Маълумот учун, бундан бир неча кун аввал бир қатор хорижий мамлакатлар, жумладан, АҚШ, Буюк Британия, Жанубий Корея, Швеция, Канада ва Болтиқбўйи элчихоналари Москвада терактлар эҳтимоллари ҳақида огоҳлантириш эълон қилган эди.

 

3 кун олдин Путин ушбу баёнотларни "очиқдан-очиқ шантаж" ва "Россия жамиятини беқарорлаштиришга уриниш" деб атади.