Финляндия Россия билан чегарани номаълум муддатга ёпди
Ҳатто Финляндия фуқаролари ҳам ўз ватанларига киролмаяпти.
Финляндия ҳукумати Россия билан чегарани ёпиқ сақлашга қарор қилди.
Қайд этилишича, чегарани очмаслик ташаббуси мамлакат Ички ишлар вазирлигидан чиққан. Департамент бу таклифни Россия Федерацияси Финляндияга қарши “бошқарув миграция”дан фойдаланишда давом этаётгани билан изоҳлади.
Эслатиб ўтамиз, ўтган йили ноябрь ойида Финляндия Россия билан чегарадаги барча назорат-ўтказиш пунктларини босқичма-босқич ёпди. Финляндия расмийлари чекловларни Африка ва Яқин Шарқдан Финляндияга Россия ҳудудидан келаётган муҳожирларнинг катта оқими билан изоҳлади.
Чегара ёпилиши бўйича охирги муддат 14 апрелда тугаши керак эди. Ҳозирда Россия-Финляндия чегарасидаги барча тўққизта назорат-ўтказиш пункти тўлиқ ёпилган. Ҳатто Финляндия фуқаролари ҳам улар орқали ўз ватанларига кира олмайди.
