Қозоғистонда йирик сув тошқини кузатилмоқда
10 та вилоятда фавқулодда ҳолат эълон қилинди
Айни кунларда мамлакат аҳолиси сўнгги 80 йилдаги энг йирик табиий офат билан курашмоқда. Сув тўғонининг бузилиши ва бунинг оқибатида юзага келган тошқинлар туфайли бутун шаҳарлар сув остида қолган, 10 та вилоятда фавқулодда ҳолат эълон қилинган.
Бугун, 6 апрель куни Қозоғистон президенти Қосим-Жомарт Тоқаев сув тошқини туфайли юзага келган мураккаб вазият муносабати билан мамлакат халқига мурожаат йўллади.
“Кўп йиллардан буён кузатилмаган табиий офат юз берди. Эҳтимол, бу ўз кўлами ва оқибатлари бўйича сўнгги 80 йилдан ортиқ вақтдаги энг йирик офатдир”, — деди президент.
Тоқаев ҳукуматга зудлик билан янги намунавий уйлар қуриш ёки мавжуд уй-жойларни реконструкция қилиш бўйича махсус режа тайёрлаш бўйича топшириқ берди.
Фавқулодда вазиятлар вазирлиги маълумотларига кўра, сув тошқини бошланганидан бери 3171 та хусусий турар-жой биноси ва 179 та ҳовли ҳудуди сув остида қолган. 46 мингдан ортиқ киши қутқарилган ва эвакуация қилинган, уларнинг тахминан 15 минг нафари болалар. Фавқулодда қутқарув ишларига 8,6 мингдан ортиқ киши жалб этилган.
