"У мени мураббий сифатида кейинги босқичга олиб чиқди"
Гвардиола Клоппнинг кетиши ҳақидаги саволдан сўнг йиғлаб юборди.
"Манчестер Сити" бош мураббийи Пеп Гвардиола Англия премьер-лигасининг 38-тури доирасидаги "Вест Ҳем Юнайтед"га (3:1) қарши ўйиндан кейин ўтказилган матбуот анжуманида немис мутахассиси Юрген Клоппнинг "Ливерпул"ни тарк этиши ҳақидаги саволдан сўнг йиғлаб юборди.
"Мен уни жуда sog'inaman... Юрген Клопп ҳаётимнинг ҳақиқатан ҳам муҳим қисми эди. У мени мураббий сифатида кейинги босқичга олиб чиқди. Биз бир-биримизни ҳурмат қиламиз. Унинг қайтиб келишини ҳис қиляпман. Мен ҳозирги ғалабаларга ёлғиз эриша олмасдим”, - деди Гвардиола.
Эслатиб ўтамиз, аввалроқ Арне Слот Юрген Клопп ўрнини эгаллаши маълум бўлганди. У "Ливерпул" билан 2027 йилгача мўлжалланган шартнома имзолаган. Хабар қилинишича, инглиз клуби "Фееноорд"га шартнома муддатидан олдин бекор қилингани учун товон пули сифатида 13–15 миллион евро тўлайди.
Гвардиола бошчилигидаги “Манчестер Сити” эса мавсум якунига кўра АПЛда 38 ўйин ўтказиб, 91 очко жамғарди. Жамоа кетма-кет тўртинчи марта Англия Премьер-лигаси чемпионлигини қўлга киритиб, мамлакат тарихида рекорд ўрнатди.
