Тошкент аэропортида йўловчи ҳушидан кетди
Ҳолат юзасидан расмий муносабат билдирилди.
Ижтимоий тармоқда Тошкент халқаро аэропортининг учиб келиш залида багаж аравачалари ва катта ҳажмдаги юклар билан одамлар тўпланиб турган вақтда аёл йўловчилардан бири ҳушидан кетгани акс этган видео тарқалди.
Расмий хабарга кўра, йўловчиларнинг тўпланиб туриши аэропортда юкларнинг кечикиши билан боғлиқ эмас. Истанбул – Тошкент йўналиши бўйича HY-272 рейси Тошкент вақти билан соат 19:04 да пойтахт аэропортига қўнган. Самолётдан юкларни тушириш 19:23 да бошланган. Багажлар ўз вақтида йўловчиларга етказилган. Йўловчиларнинг тўпланиб қолиши багажлар олингач божхона назоратига ўтиш жойида кузатилган.
Таъкидланишча, божхона қўмитаси ходимлари томонидан фуқароларга бир неча бор қонун ҳужжатлари бўйича тушунтиришлар берилганига қарамай, кўп миқдорда юки бўлган бир неча йўловчилар тижорат мақсадида олиб келинган товарларни божхона назоратидан ўтказиш ва расмийлаштиришдан бош тортган.
Учиб келиш залида ҳушидан кетган аёлга аэропорт тиббиёт ходимлари томонидан биринчи тиббий ёрдам кўрсатилган ва аёлнинг ҳушдан кетишига унинг соғлиғидаги муаммолар сабаб бўлган.
