Ҳасанбой Дўсматов икки карра Олимпиада чемпиони бўлди
Шу тариқа делегация ҳисобига 3-олтин медаль ёзилди.
Бокс бўйича Ўзбекистон терма жамоаси аъзоси Ҳасанбой Дўсматов (-51 кг) икки карра Олимпия ўйинлари чемпиони шарафига муяссар бўлган илк ўзбек боксчисига айланди.
Ҳамюртимиз ҳозиргина якунланган чемпионлик жангида мезбон боксчи Билал Беннамани мағлуб этиб, делегациямизга Париж-2024 ёзги Олимпия ўйинларининг олтин медалини тақдим этди.
Эслатиб ўтамиз, аввалроқ таэквондо бўйича Улуғбек Рашитов ҳам икки карра Олимпия ўйинлари ғолиблигини қўлга киритиб, бу борада биринчи ўзбекистонликка айланганди.
Кун аввалида 45-ўринда турган Ўзбекистон делегацияси Париж-2024даги медалларини 5 тага (3 та олтин, 2 та бронза) етказиб, умумжамоа ҳисобида 18-поғонага кўтарилди.
