Роналду терма жамоадан четлатилди: унга нисбатан интизомий иш очилди
Ҳозирча унга нисбатан якуний жазо белгиланмаган.
Португалия футбол федерацияси (FPF) Криштиану Роналдуга нисбатан интизомий иш қўзғатди. Бунга футболчининг 7 октябрь куни юз берган воқеалар билан боғлиқ ҳаракатлари сабаб бўлган.
A Bola нашри хабар беришича, 41 ёшли ҳужумчи миллий терма жамоа ихтиёрини ўзбошимчалик билан тарк этгани учун текширувга тортилган. Шунингдек, унга нисбатан вақтинчалик четлатиш чораси қўлланди.
Федерация маълумотига кўра, 9 октябрь куни Интизом кенгашининг профессионал бўлмаган футбол бўлими Роналдуга нисбатан интизомий иш очиш тўғрисида қарор қабул қилган. 10 октябрь куни эса иш материаллари Интизомий тергов комиссиясига юборилган.
FPF баёнотида футболчига нисбатан қўшимча эҳтиёт чораси сифатида четлатиш жазоси қўллангани ва иш шошилинч тартибда кўриб чиқилиши белгилангани айтилган. Тергов якунлангунига қадар иш тафсилотлари ошкор этилмайди.
Ҳозирча Роналдуга нисбатан якуний интизомий жазо белгилангани ҳақида маълумот берилмаган. Тергов натижалари футболчининг Португалия терма жамоасидаги кейинги иштирокига таъсир қилиши мумкин.
