Боррел: Европа Иттифоқи Украинани мағлуб этиш эвазига урушни тугатишга қарши
Бу ҳақида ЕИ дипломатияси раҳбари БМТ Хавфсизлик кенгаши йиғилишида фикр билдирди.
"Мен барча “тинчликсеварларга” мурожаат қиламан: бу уруш қандай тугаши муҳимлигини унутманг", — деди Боррел.
Унинг сўзларига кўра, агар украиналиклар ўз давлатларининг яхлитлигини бузишга кўнса, бу тажовузкор учун "яхши ўрнак" бўлади ва у буни қайта-қайта такрорлашни хоҳлайди".
Жозеп Боррел Украинадаги вазият бўйича БМТнинг аниқ ҳисоботлари мазмунини эслатди: "Уйлар ва инфратузилмалари атайлаб вайрон қилинган, тинч аҳоли яшаш учун зарур бўлган хизматлардан маҳрум бўлган, айниқса қиш мавсуми бошланганда мамлакатнинг учдан икки қисми учун электр энергияси ишлаб чиқариш қуввати йўқ қилинган".
Европа Иттифоқи дипломатияси раҳбари, шунингдек, Россия Федерациясига КХДР ва Эрондан қурол-яроғ, жумладан, баллистик ракеталар етказиб берилишини қоралади.
"Ушбу қуроллар Украина тинч фуқароларига қарши қўлланилиши, бундан кейин ҳам азоб-уқубат ва вайронагарчиликларга сабаб бўлиши мумкин. Шунингдек, бундай таъминотлар Европа хавфсизлигига бевосита таҳдиддир", — дея қўшимча қилди Боррел.
