Бангладешда данг эпидемияси кучаймоқда: 418 киши вафот этди
Мутахассислар эпидемия ноябрь ойида ҳам давом этиши, вазият декабргача ҳам яхшиланмаслигини прогноз қилмоқда.
Бангладешда данг безгаги эпидемияси кучаймоқда. Йил бошидан буён касаллик оқибатида 418 киши вафот этди, 133 мингдан ортиқ бемор шифохонага ётқизилди. Мутахассислар вирус тарқалиши ноябрь ойида ҳам давом этиши, сезиларли пасайиш эса декабргача кузатилмаслиги мумкинлигини билдирмоқда.
Мамлакат Соғлиқни сақлаш вазирлиги маълумотларига кўра, октябрь ойида данг безгагидан 173 киши вафот этган. Бу сентябрь ойидаги 148 та ўлим ҳолатидан кўп бўлиб, 2026 йилнинг ҳозиргача энг кўп қурбон қайд этилган ойига айланган.
Айни пайтда мамлакат дунёдаги энг йирик қизамиқ эпидемияси билан ҳам курашмоқда. Ушбу касаллик 1 200 нафардан ортиқ кишининг ҳаётига зомин бўлган. Икки эпидемиянинг бир вақтда тарқалиши Бангладеш соғлиқни сақлаш тизимига қўшимча юклама туширмоқда.
Шифокорларнинг айтишича, кўплаб беморлар касаллик оғир асоратлар билан кечишни бошлаганидан кейингина шифохонага мурожаат қилмоқда. Даккадаги Шаҳид Суҳравардй тиббиёт коллежи ва шифохонасида 279 нафар данг безгаги билан касалланган бемор даволанмоқда. Бир кун ичида муассасага яна 67 киши ётқизилган.
Мутахассислар касалликнинг қайта юқиши, шунингдек, ташхис қўйиш ва даволашнинг кечикиши оғир ҳолатлар хавфини ошираётганини таъкидламоқда. Данг вирусининг тўртта серотипи ҳам мамлакатда айланиб юриши сабабли аввал касалланган одам бошқа серотипни қайта юқтириши ва оғир асоратларга дуч келиши мумкин.
Жаҳангирнагар университети энтомологи Кабирул Башарнинг прогнозига кўра, ноябрь ойида касалланиш бироз камайиши мумкин, бироқ вирус тарқалиши давом этади. Унинг фикрича, сезиларли яхшиланиш декабргача кузатилмаслигининг эҳтимоли юқори.
Мутахассис буни аввалги ёғингарчиликлар натижасида чивинлар кўпайиши учун қулай жойлар пайдо бўлгани билан изоҳлаган. Шунингдек, иқлим ўзгариши сабабли ёғингарчилик ва намлик режимининг ўзгариши чивинларнинг кўпайиш мавсумини узайтирмоқда.
Reuters хабарига кўра, Бангладешда ҳозирча данг безгагига қарши вакцина жорий этилмаган, бироқ расмийлар уни узоқ муддатли чора сифатида қўллаш имкониятини кўриб чиқмоқда.
