Трамп қароргоҳига зенит-ракета мажмуалари жойлаштирилди: хавфсизлик чоралари кучайтирилди

АҚШ президенти Дональд Трампнинг Флорида штатидаги Мар-а-Лаго қароргоҳи ҳудудига зенит-ракета мажмуалари жойлаштирилди. Бу ҳақда The Telegraph нашри хабар берди.

 

Нашр маълумотига кўра, бу қарор хавфсизликка таҳдидлар кучайгани ҳақидаги огоҳлантиришлар фонида қабул қилинган. Трамп ҳам махсус хизматларнинг хавф ҳақидаги огоҳлантиришидан сўнг сайловолди кампанияси доирасида режалаштирилган айрим оммавий тадбирларни бекор қилган.

 

АҚШ Махфий хизмати вакилининг The Telegraph'га айтишича, идора юқори даражадаги таҳдидлар шароитида фаолият юритмоқда ва қўриқланадиган шахслар хавфсизлигини таъминлаш учун илғор қурол-яроғ, технологиялар ҳамда усуллардан фойдаланмоқда.

 

Шу ҳафта Трамп Айова ва Канзас штатларида ўтказилиши режалаштирилган сайловолди тадбирларини бекор қилишини, уларнинг ўрнига телемарафонлар ташкил этилишини маълум қилган эди. Бироқ 30 октябрь куни Оқ уй президент ҳали ҳам сайловчилар билан юзма-юз учрашувлар ўтказишга умид қилаётганини билдирди.

 

Трампнинг иш жадвалидан хабардор The Telegraph манбасига кўра, иккала митинг ҳам якшанба куни ўтказилиши режалаштирилган.

 

Хавфсизлик чоралари доирасида Трамп Мар-а-Лагога ташриф буюрган пайтларда қароргоҳ атрофидаги ҳаво ҳудуди ҳам Махфий хизмат сўровига биноан чекланмоқда. Федерал суд ҳужжатларида идора «номақбул таҳдидлар», жумладан, террорчилик таҳдидлари ҳақидаги маълумотлар сабабли ушбу ҳудудни доимий равишда ёпишни режалаштираётгани қайд этилган.