Польшада Украина Қуролли Кучлари учун украиналиклардан бригада йиғилмади
Бу ҳақида Польша мудофаа вазири маълум қилди.
"Польша ҳукумати мамлакатда яшовчи, "Украина легиони" сафига қўшилишга ва Украинага жанг қилиш учун боришга тайёр бўлган етарли миқдордаги украиналикларни топа олмади", — деди вазир Владислав Косинияк-Камиш.
Июл ойида Польша билан мудофаа шартномасини имзолаган Владимир Зеленский бу давлат ҳудудида "Украина легиони" деб аталувчи кўнгилли гуруҳлар ташкил этилиши, бригадаларнинг шахсий таркиби ўқитилиши, қуролланиши ва Украинани ҳимоя қилишга тайёрланиши кераклигини айтди. Кўнгиллиларни тайёрлаш учун жавобгарлик Польша қуролли кучларига ва ёллаш эса Киевга юкланган.
Украинанинг Варшавадаги элчиси Василий Зварич май ойида Россиянинг Украинада ҳарбий ҳаракатлар бошлаган вақтигача Польшада 1,5 миллиондан 2 миллионгача украиналиклар яшаганини, яна 1,3 миллиони бу ерга 2022 йил 24 февралдан кейин келганини айтди. 2024 йил май ойи ҳолатига кўра, Польшада доимий яшовчи, ишлаётган ва солиқ тўлайдиган Украина фуқароларини ҳисобга олмаганда, 950 мингга яқин қочқин бўлган.
