Каспий денгизи соҳилларида мингдан ортиқ ўлик тюленлар топилди
Айни вақтда олимлар уларнинг ўлими сабабларини аниқламоқда.
Қозоғистоннинг Манғистау вилоятидаги Каспий денгизи соҳилида мингдан ортиқ тюленларнинг жасади топилди, олимлар уларнинг ўлими сабабларини аниқламоқда. Бу ҳақида Гидробиология ва экология институти директори Миргалия Баймуканов маълум қилди.
“Ўлик тюленлар сони ҳозирда мингдан ошди. Эҳтимол, ўлик ҳайвонларнинг чиқиши тўхтамайди, бу бизнинг қирғоқларимизда эсаётган ғарбий шамоллар билан боғлиқ ва улар яна қирғоққа чиқиб қолиши мумкин. Тюленлар сентябрь охиридан шу кунга қадар аниқланди”, - деди Баймуканов.
Баймуконовнинг таъкидлашича, тюленларнинг нобуд бўлишига нима сабаб бўлганини ҳозирча аниқ айтиб бўлмайди. “Ҳозир биз материал йиғиш босқичидамиз. Уларнинг нобуд бўлиш сабабини аниқлаш учун кўплаб томонларни жалб қилиш керак. Булар қандайдир ифлослантирувчи чиқиндилар, сейсмик фаоллик кўринишидаги табиий офатлар бўлиши мумкин, яъни геологлар ўз сўзларини айтишлари керак. Вирусологлар ҳайвонларнинг нобуд бўлишига олиб келиши мумкин бўлган вируслар бор-йўқлигини аниқлайди”, - деб тушунтирган Миргалия Баймуканов .
Мутахассиснинг қўшимча қилишича, нобуд бўлган тюленларнинг кичик гуруҳида зарар излари топилган, бироқ бу уларнинг нобуд бўлиш сабаблари ҳақида хулоса чиқаришга имкон бермайди.
