21-асрдаги энг ғалати трансфер
Бу "Ливерпул" ва Тоттенҳем" жамоалари иштирокида содир бўлган.
АПЛнинг навбатдаги турининг марказий ўйини Лондонда бўлиб ўтди. Унда "Ливерпул" "Тоттенҳем"ни 3:6 ҳисобида мағлуб этди. Ўйиндан сўнг Арне Слот жамоаси турнир жадвалидаги пешқадамлигини мустаҳкамлаган бўлса, лондонликлар билан эса бунинг акси содир бўлди. 16 йил олдин икки жамоага тегишли бўлган ғалати трансфер содир бўлганди. Гап ҳужумчи Робби Кин ҳақида кетмоқда. Ўшанда футболчи "Тоттенҳем"дан "Ливерпул"га ўтганди. Олти ойдан сўнг эса яна эски жамоасига келиб қўшилган.
Кин 2008 йилнинг ёзида "Ливерпул"га ўтди ва унинг трансфери мерсисайдликлар учун 24 миллион еврога тушди. Ўшанда Робби "Тоттенҳем" сардори эди. Трансфердан бир неча ой олдин Кин Лондон клуби билан Англия лига кубогини қўлга киритганди. Айтиш керакки, "Тоттенҳем" "Ливерпул"нинг ушбу трансферни амалга оширганидан жуда хафа бўлади. Лондон клуби раҳбарлари мерсисайдликларни футболчи билан пойтахт жамоасининг рухсатисиз музокара олиб боришда айблайди.
"Ливерпул" трансфер устида ишлаётганини эшитганимда жуда хафа бўлдим, - деган "Тоттенҳем" раҳбари Даниел Леви. Бундан ташқари, Роббининг ўзи кетиш истагини билдирганидан ва уни сотишни сўраганидан хафа бўлдим. Тушунишимча, трансфер икки клубнинг розилиги билан амалга оширилади. Бу мажбурий сотиш эди. Биз 24 миллион еврога келишиб олдик. Мен "Ливерпул"нинг хатти-ҳаракатини шармандали деб айтган бўлардим. Биз бошиданоқ Кинни сотишдан манфаатдор эмаслигимизни айтган эдик. "Ливерпул"дан футболчини ўз томонига оғдиришга уринмасликни сўрадик. Клуб бу илтимосни эътиборсиз қолдирди. Улар бизнинг рухсатимизсиз футболчи ва агентлар билан боғланишди”.
Шунга қарамай, "Ливерпул" Кин билан шартнома имзолайди. Ирландияликнинг ўзи бу трансфердан кейин болалигида мерсисайдликларни қўллаб-қувватлаганини айтади. Бироқ, Кин "Энфилд"да бир неча ой ўйнайди. 28 ўйин, етти гол, бешта голли узатма: бу унинг "Ливерпул" сафидаги статистикаси эди.
"Тўғрисини айтсам, нима учун Кинни сотиб олганимизни тушунмадим", - деган "Ливерпул"нинг собиқ ҳимоячиси Жейми Каррагер бир неча йил ўтиб. Робби "Тоттенҳем"нинг энг яхши ўйинчисига айланди, аммо биз ҳужумда муаммога дуч келмаётган эдик. Кин "Ливерпул"га ўтганида ҳайрон бўлдим. У Бенитес билан келиша олмади. Бошқа мураббий бўлганида ҳаммаси бошқача бўлиши мумкин эди”.
Ўшанда Фернандо Торрес марказий ҳужумчи сифатида ўйнарди, Стивен Жеррард эса унга орқароқда ёрдам берарди. Бундай вазиятда Киннинг имконияти кам эди. Ирландиялик футболчи ҳеч қачон Рафаэл Бенитес қўл остида "Ливерпул" таркибида мустаҳкам ўрин эгалламаган.
"Бенитес мени чап қанот ҳимоячиси қилмоқчи эди. Лекин, бу менинг позициям эмаслиги ҳаммага аён. Марказий ҳужумчи сифатида ўйнаганимда гол урганман. Бу гол уришга одатланган одам учун фалокат. Бошқа томондан, Бенитес мен ишлаган барча мураббийлар ичида тактикани жуда яхши биладиган мураббий. У ўйинни ичкарисидан ҳам, ташқаридан ҳам билади. Ҳеч нарсадан афсусланмайман. Менга буюк клубда ўйнаш ва "Энфилд"да гол уриш бахтига муяссар бўлдим".
Кин ўша йили қишки трансфер ойнасининг сўнгги кунида "Ливерпул"ни тарк этди. Қизиғи шундаки, у яна "Тоттенҳем"га қайтади. Лондон жамоаси собиқ футболчиси учун 16,7 миллион евро тўлайди.
"Тоттенҳем" қайтишимни хоҳларди. Мен, ўз навбатида, заҳирада ўтиришни хоҳламадим. Албатта, "Ливерпул"да узоқ вақт қолишга умид қилгандим, аммо вазият бошқача бўлиб чиқди", - дея эслайди футболчи.
Бенитес трансфердан кейин клуб тўғри қарор қабул қилганини айтди. Ўшанда Кин 29 ёшда эди, испаниялик мураббийнинг сўзларига кўра, агар мерсисайдликлар ўйинчини сотишни кечиктирганларида, улар жиддийроқ йўқотишларга дуч келишарди. Чунки, ўшанда ирландияликнинг нархи янада арзонлашганди.
“Кин жуда яхши футболчи. Лекин, биз тезда қарор қабул қилишимиз керак эди. Бизнес нуқтаи назаридан, уни айни ўша вақтда сотиш яхшироқ эди. Биз бу қадамни ташладик. Агар буни кейинроқ қилганимизда, футболчи учун ҳам, биз учун ҳам ёмон бўларди. Робби профессионал тарзда ҳаракат қилди. У қаттиқ меҳнат қилди. Кийиниш хонасида у билан боғлиқ ҳеч қандай муаммога дуч келмадик”.
Лондон клубига қайтганидан сўнг Кин 52 та ўйин ўтказиб, 15 та гол урди. Шундан сўнг "Селтик" ва “Вест Хем”да ижара асосида ўйнайди. Ундан кейин, 2011 йилда эса “Лос-Анжелес Гелакси”га жамоасига ўтади. Кин 2018 йилда фаолиятини якунлайди.
