Сурияда сув тошқинлари: 7 киши ҳалок бўлди
Кучли ёмғир мамлакатда кўприклар ва транспорт инфратузилмасига зарар етказган.
Сурияда кучли ёғингарчилик оқибатида юзага келган сув тошқинлари етти кишининг, жумладан, беш нафар боланинг ҳаётига зомин бўлди. Яна етти киши жароҳатланган, тўрт киши бедарак йўқолган. Бу ҳақда мамлакат Фавқулодда вазиятлар ва табиий офатларни бартараф этиш вазири Раед ас-Салеҳ маълум қилди.
Табиий офат 27 октябрь куни бошланган ва Раққа, Дайр аз-Зор, Ҳасака, Ҳалаб ҳамда бошқа ҳудудларга тарқалган. Кучли ёмғир ва шамол транспорт инфратузилмасига зарар етказиб, бир нечта кўприк ва сув ўтказгичларнинг қулашишига сабаб бўлган.
Қутқарув гуруҳлари сўнгги 24 соат ичида 550 дан ортиқ фавқулодда чақирувга жавоб берган. Сув тошқини хавфи туфайли ўнлаб оилалар, шунингдек, мактаблардан юзлаб ўқувчилар хавфсиз жойларга кўчирилган. Раққа вилоятидаги қочқинлар лагерларидан ҳам юзлаб оилалар эвакуация қилинган.
Сурия расмийлари ҳозирда сув босган уйлар, мактаблар ва шифохоналардан сувни чиқариш ҳамда зарар кўрган ҳудудларда ҳаётни тиклаш ишларини олиб бормоқда. Қутқарувчилар бедарак йўқолган тўрт кишини қидиришни давом эттирмоқда.
