Нью Ёркда марказий йўлларда ҳаракатланиш пулли бўлди
Дастур 5 январдан ишга туширилган.
Энди АҚШнинг Нью Ёрк шаҳрида ҳайдовчилар тиғиз соатларда марказий йўллардан ҳаракатланиш учун пул тўлайди. Бу ҳақида "Финансиал Тимес" нашри хабар бермоқда.
Маълум қилинишича, дастур 5 январь куни ишга туширилган. “Тирбандлик учун тўлов” аҳоли зич яшайдиган шаҳарда транспорт тирбандликларини камайтиришга қаратилган. Иш кунлари Манҳеттеннинг энг гавжум ҳудудларига кириш нархи 9 долларгача баҳоланиши мумкин. Иш вақтидан ташқари кўпчилик транспорт воситалари учун йўллардан фойдаланиш нархи 2,25 долларни ташкил этади.
Кичик юк машиналари ҳайдовчилари тиғиз вақтда 14,40 доллар, каттароқ юк машиналар эса 21,60 доллар тўлайди. Ушбу тизим шаҳар марказига кирадиган автомобиллар сонини тахминан 10 фоизга камайтириши, Ню Ёркда жамоат транспортини ривожлантириш учун 15 миллиард доллар йиғишга ёрдам бериши кутилмоқда.
Жорий этилган йўл ҳақи тўлови тизимининг истиқболи ноаниқ бўлиб қолмоқда. Республикачилар сайланган президент Доналд Трампни дастурга берилган федерал рухсатномани бекор қилишга даъват этмоқда.
