Япониялик қўшиқчи “Ўзбек маданияти элчиси” этиб тайинланди

Ўзбекистон Республикаси ва Япония ўртасида маданий алоқаларни янада кенгайтириш, юртимиз бой маданий мероси, хусусан миллий мусиқаси ва куйларини кунчиқар мамлакатда кенг тарғиб қилиш орқали мамлакатимиз ихлосмандларини ошириш мақсадида, Ўзбекистон Республикаси Маданият вазирлиги ҳамда Элчихона билан ҳамкорликда япониялик таниқли қўшиқчи ва созанда – Комазаки Машуни “Ўзбек маданияти элчиси” этиб тайинлаш маросими ўтказилди.

 

Тадбирда юртимизнинг Япониядаги элчиси Муҳсинхўжа Абдураҳмонов томонидан Ўзбекистон ва Япония давлатлари ўртасидаги маданий-маърифий алоқаларни ривожлантириш ва кенг жамоатчилик вакилларини юртимизнинг бой тарихий-маданий мероси билан яқиндан таништиришга қўшаётган муносиб ҳиссаси учун Машу Комазаки хонимга “Ўзбек маданияти элчиси” кўкрак нишони ва сертификати тантанали равишда топширилди.

 

Маълумот учун: M.Komazaki 1988 йил 16 октябрда Токио шаҳрида туғилган. 2010 йилда Токио мусиқа университети фортепиано факультетини тамомлаган. 2015-2017 йилларда Япониянинг хориждаги ҳамкорлик кўнгиллилари (ЖОСВ) дастури бўйича Ўзбекистоннинг Бухоро шаҳридаги ўрта умумтаълим мактабида кўнгилли равишда мусиқа ўқитувчиси сифатида фаолият юритган.

 

Ўзбекистондаги фаолияти давомида миллий мусиқамиздан таҳсил олиб, ўзбек дуторини ўрганган. 2018 йилда Ўзбекистонда бўлиб ўтган Биринчи Халқаро мақом санъати анжуманида ўзбек дуторида «Сунбула» куйини ижро этиб, фахрли учинчи ўринни эгаллаган.