Чанг, олтингугурт диоксиди ва углерод оксиди: Бекободдаги корхонада экологик қоидабузарликлар аниқланди
Корхона ҳавога меъёрдан 1 533 баравар кўп зарарли модда чиқарган.
Тошкент вилоятининг Бекобод шаҳрида фаолият юритувчи «М.К.» корхонасида атмосфера ҳавосига чиқарилаётган ифлослантирувчи моддалар миқдори белгиланган меъёрлардан сезиларли даражада юқори экани аниқланди. Бу ҳақда Экология ва иқлим ўзгариши миллий қўмитаси маълум қилди.
Қайд этилишича, Экополиция ходимлари томонидан корхонанинг электрда пўлат эритиш ва ферроқотишмалар ишлаб чиқариш бўлинмалари фаолияти ўрганилган.
Лаборатория таҳлиллари натижасида электрда пўлат эритиш бўлинмасида ноорганик чанг меъёрдан 2,4 баравар, олтингугурт диоксиди 1 533 баравар, углерод оксиди эса 20 баравар кўп чиқарилаётгани тасдиқланган.
Ферроқотишмалар ишлаб чиқариш бўлинмасида ҳам ифлослантирувчи моддалар миқдори меъёрдан юқори экани аниқланган. Хусусан, ноорганик чанг 24,9 баравар, азот диоксиди 2,12 баравар, углерод оксиди эса 23,3 баравар кўп чиқарилган.
Шунингдек, электрда пўлат эритиш цехидаги чанг-газ тозалаш ускуналари самарали ишламаётгани, бунинг оқибатида ифлослантирувчи моддаларнинг бир қисми тўғридан-тўғри атмосферага чиқиб кетаётгани қайд этилган.
Ўрганиш давомида корхонада экологик экспертиза хулосалари талаблари тўлиқ бажарилмагани, айрим ифлослантирувчи манбаларда автоматлаштирилган мониторинг тизимлари ўрнатилмагани ҳамда лаборатория назорати етарли даражада ташкил этилмагани ҳам маълум бўлган.
Аниқланган камчиликлар юзасидан ҳисоб-китоб қилиниб, корхонага атроф-муҳитни ифлослантирганлик учун 1 миллиард 630 миллион 920 минг 419 сўм компенсация тўлови белгиланган.
Бундан ташқари, корхонага қонунбузилишларни бартараф этиш бўйича мажбурий кўрсатмалар берилган. Жумладан, чанг-газ тозалаш ускуналари фильтрларини тўлиқ алмаштириш, уларнинг самарадорлигини камида 95 фоизга етказиш, лаборатория назоратини кучайтириш ва асосий ифлослантирувчи манбаларга автоматик мониторинг станцияларини ўрнатиш топширилган.
