Истанбулда таълим муассасалари вақтинча ёпилди
Бунга мамлакатда кузатилган аномал совуқ сабаб бўлган.
Туркиянинг Истанбул шаҳрида давом этаётган кучли қор ёғиши туфайли барча таълим муассасаларида ўқиш вақтинча тўхтатилди. Бу ҳақида Истанбул губернатори Давут Гюл ўзининг Х саҳифасида эълон қилди.
Губернаторнинг сўзларига кўра, аномал совуқ билан кечаётган қор ёғиши шаҳар ҳаётига салбий таъсир кўрсатмоқда. Метеорологик прогнозларга кўра, ёғингарчилик давом этиши ва ҳарорат янада пасайиши кутилмоқда. Шу сабабли 12 февраль куни Истанбулдаги барча ўқув юртларида бир кунлик танаффус эълон қилинди.
Бундан ташқари, айрим ходимлар учун ҳам маъмурий таътил жорий этилди. Хусусан, ногиронлиги бор шахслар, сурункали касалликлардан азият чекаётганлар ҳамда ҳомиладор давлат хизматчилари 12 февраль куни иш жойига бормасликлари мумкин деб белгиланди.
Истанбулда қишки об-ҳаво шароитига боғлиқ қийинчиликлар юзага келганлиги сабабли маҳаллий ҳокимият фуқароларни эҳтиёт бўлишга ва заруратсиз кўчага чиқмасликка чақирмоқда.
