Люксембург шаҳзодаси ноёб касалликдан вафот этди
У бу касалликдан 6 йил азият чекканди.
Люксембург шаҳзодаси Фредерик POLG митохондриял касаллиги билан узоқ йиллик курашдан сўнг 1 март куни Парижда 20 ёшида вафот этди. Унинг оиласи хабарига кўра, шаҳзода 14 ёшида ушбу ноёб генетик касалликка чалингани аниқланган бўлиб, у кўплаб орган тизимларига таъсир қилган ва даволаш усули мавжуд эмас эди.
Шаҳзода Фредерик касаллик ҳақида хабардорликни ошириш мақсадида 2022 йилда POLG жамғармасига асос солган. Унинг отаси, шаҳзода Роберт, ўғлининг ўлими ҳақида эълон қилар экан, Фредерик бу дардга чалинган бошқа беморларни азоб-уқубатлардан қутқариш учун илмий тадқиқотларга катта эътибор қаратганини таъкидлади.
Фредерик вафотидан олдин яқинлари билан хайрлашиш учун куч топгани айтилади. У умрининг сўнгги кунигача интизомли ва фаол бўлиб, ҳатто вафотидан бир кун олдин ҳам Дуолинго дарсларини давом эттиргани маълум қилинди.
