Қашқадарёда Nexia ҳайдовчиси уч нафар инспекторни уриб кетди
Оқибатда икки нафар профилактика инспектори ҳалок бўлди.
Қашқадарё вилоятининг Муборак туманида юз берган йўл-транспорт ҳодисаси икки нафар ички ишлар ходимининг умрига зомин бўлди. Дастлабки маълумотларга кўра, Nexia автомобилини бошқарган ҳайдовчи рулда ухлаб қолган ва йўлда хизмат олиб бораётган уч нафар профилактика инспекторини уриб кетган.
Фожиа оқибатида улардан бири воқеа жойида, яна бири эса шифохонада вафот этган. Учинчи инспектор эса ҳозирда шифохонада даволанмоқда.
Бош прокуратура матбуот котиби Ҳаёт Шамсутдиновнинг маълум қилишича, ҳодиса юзасидан Жиноят кодексининг 266-моддаси 3-қисми «а» банди (одам ўлимига сабаб бўлган ЙТҲ) билан жиноят иши қўзғатилган. Суд қарорига биноан ҳайдовчига нисбатан қамоқ эҳтиёт чораси қўлланган.
