Автобус салонидаги мусиқа юзасидан шикоят: ҳайдовчига огоҳлантириш берилди
Автобус ҳайдовчисининг мусиқани баланд овозда қўйиб ҳаракатлангани йўловчилар эътирозига сабаб бўлди.
Ижтимоий тармоқларда автобус салонида мусиқани баланд овозда қўйиб ҳаракатланган ҳайдовчи юзасидан танқидий мурожаат тарқалди. Ҳолат «Тошшаҳартрансхизмат» АЖнинг “7-Автобус саройи” филиали масъул ходимлари томонидан ўрганилди.
Маълум бўлишича, 2026 йил 17 октябрь куни тахминан соат 21:00 да 01 396 СКА давлат рақамли автобус ҳайдовчиси 13-сонли йўналишда ҳаракатланаётиб, салонидаги мусиқани баланд овозда қўйган ва йўловчиларга ноқулайлик туғдирган.
Ҳолат юзасидан ҳайдовчидан тушунтириш хати олинган. Унга йўловчиларга сифатли ва хавфсиз хизмат кўрсатиш, муомала маданиятига риоя қилиш ҳамда йўналишда ҳаракатланиш қоидаларига амал қилиш бўйича тушунтириш берилган.
«Тошшаҳартрансхизмат» АЖ ахборот хизматининг маълум қилишича, ҳайдовчи бундай ҳолат яна такрорланса, белгиланган тартибда қатъий чоралар кўрилиши ҳақида огоҳлантирилган.
