Дунёдаги энг хавфли вулқонлардан бири фаоллашди
Лава фавворалари 100 метр баландликка чиқмоқда.
Дунёнинг энг хавфли ва фаол вулқонларидан бири ҳисобланган Килауэа яна уйғонди. АҚШ Геология хизмати (УСГС) маълумотларига кўра, Гавайи оролларининг Катта оролида жойлашган ушбу вулқон кучли отилишлар билан фаолият кўрсатмоқда.
Мутахассислар баландлиги 50 метрдан 100 метргача етадиган лава фаввораларини қайд этган. Қолаверса, отилишларнинг давомийлигида ҳам сезиларли ўзгариш кузатилмоқда. 2024 йил декабрида отилишлар атиги 13 соат давом этган бўлса, ҳозирда улар саккиз кунгача тўхтовсиз давом этмоқда.
Килауэа вулқони 1250 метр баландликда жойлашган бўлиб, у узоқ йиллардан бери геологлар эътиборида. Сўнгги фаоллик эса хавфсизлик чораларини кучайтиришни тақозо қилмоқда.
