Британия тарихида илк бор аёл MI6 раҳбари этиб тайинланди
Аёл илк бор Буюк Британия махфий хизматига бошчилик қилади.
Буюк Британия тарихида илк бор аёл киши — Блез Метревели — MI6 (Ташқи разведка хизмати) бошлиғи этиб тайинланди. Бу ҳақда Бош вазир Кир Стармер расмий баёнот орқали маълум қилди. Унга кўра, ушбу тайинлов ҳозирги хавфсизлик муаммолари ва глобал таҳдидлар фонида ниҳоятда долзарб ҳисобланади.
47 ёшли Метревели Кембриж университетида антропология бўйича таҳсил олган. У MI6 тизимига 1999 йилда қўшилган ва ўз фаолиятининг асосий қисмини Европа ҳамда Яқин Шарқдаги миссияларга бағишлаган. Ҳозирда у разведканинг технологик бўлимига раҳбарлик қилмоқда. Унга қадар хизматга беш йил давомида Ричард Мур бошчилик қилган.
Май ойида The Times газетаси ушбу лавозим учун бир нечта аёл номзод кўриб чиқилаётганини хабар қилган эди. Шулар орасида собиқ Хитойдаги элчи Барбара Вудворд номи тилга олинган, бироқ унинг Хитой билан илиқ алоқалари танқидга учраган.
Блез Метревелининг тайинланиши нафақат тарихий бурилиш, балки Британия разведка тизимида гендер тенглигига йўл очувчи қадам сифатида ҳам баҳоланмоқда.
