Конгода кучли ёмғир оқибатида 29 киши ҳалок бўлди
Бу ҳақда маҳаллий ҳокимият маълумот берган.
Дам олиш кунлари Конго Демократик Республикасининг пойтахти Киншасада ёғган кучли ёмғир оқибатида камида 29 киши ҳалок бўлди. Бу ҳақда маҳаллий ҳокимият бугун расмий маълумот берди.
Қурғоқчилик даврида ёғган ёмғирлар шаҳарга катта зарар етказди. Йўлларни сув босиб, инфратузилма ишдан чиқди, электр ва ичимлик суви таъминотида кенг кўламли узилишлар юз берди.
Киншаса губернатори Даниел Бумба эвакуация ва вақтинчалик жойлаштириш ишлари олиб борилаётганини айтиб, аҳолига эҳтиёт чораларини кўришни тавсия қилди.
Метеорология хизматининг маълумотига кўра, ёмғир миқдори 90 мм га етган бўлиб, бу сўнгги йиллардаги энг юқори кўрсаткичдир. Кучли ёмғирлар яқин кунларда ҳам давом этиши кутилмоқда.
