Қирғизистонда давлат тилини билмаган амалдорлар жаримага тортилади
Эндиликда Қирғизистонда телевидение ва радиода ҳам давлат тили устувор бўлади.
Қирғизистон парламенти давлат тилидан фойдаланишни тартибга солувчи қонунчиликка ўзгартишлар киритиш бўйича қонун лойиҳасини иккинчи ва учинчи ўқишда маъқуллади. Бу ҳақда 24.kg ахборот агентлиги хабар берди.
Қонунга киритилаётган ўзгартишларга мувофиқ, бир қатор мансабдор шахслар учун қирғиз тилини етарли даражада билиш мажбурияти жорий этилади. Улар орасида:
- парламент депутатлари;
- Вазирлар Маҳкамаси раиси ва аъзолари;
- Конституциявий, Олий ва маҳаллий судлар судьялари;
- прокурорлар ва терговчилар;
- Миллий банк, ҳуқуқни муҳофаза қилиш ва миллий хавфсизлик ходимлари мавжуд.
Шунингдек, адвокатлар ва нотариуслар ҳам қирғиз тилини билмаса, лицензия олиш ҳуқуқидан маҳрум этилади.
Бундан ташқари, “Телевидение ва радиоэшиттириш тўғрисида”ги қонунга киритилган тузатишларга кўра, телекўрсатув ва радиоэшиттиришларнинг камида 60 фоизи давлат тилида бўлиши шарт этиб белгиланди.
“Ташқи миграция тўғрисида”ги қонунга мувофиқ, эндиликда давлат тилини билмаслик доимий яшаш учун рухсатнома беришни рад этишга асос бўлади. Шунингдек, қирғиз тилини билмаган чет эл фуқаролари иммигрант мақомини олиш ҳуқуқига эга бўлмайди.
Реклама матнлари ҳам давлат тилидаги имло қоидаларига мувофиқ тайёрланиши ва маҳаллий ҳокимият томонидан кўриб чиқилиши шарт бўлади.
Қонун бузилган тақдирда қуйидаги жарима чоралари қўлланилади:
- жисмоний шахсларга – 5 минг сом (тахминан 711 минг сўм);
- юридик шахсларга – 17 минг сом (тахминан 2,4 миллион сўм).
Тил сиёсатига оид қоидабузарликлар юзасидан қарор қабул қилиш ваколати Давлат тили ва тил сиёсати бўйича Миллий комиссия зиммасига юклатилди.
