Путин Бразилиядаги BRICS саммитига бормайди
Кремль бу қарорни бевосита Бразилиянинг Халқаро жиноий судга аъзолиги билан боғлади.
Россия Президенти Владимир Путин 6–7 июль кунлари Бразилияда бўлиб ўтадиган BRICS давлатлари саммитида видеоконференция шаклида иштирок этади. Бу ҳақда Россия президентининг ёрдамчиси Юрий Ушаков маълум қилди.
Унинг айтишича, қарор Бразилиянинг Халқаро жиноят судига (XJS) аъзолиги билан бевосита боғлиқ. Эслатиб ўтамиз, XJS 2023 йилда Путинни ҳибсга олиш бўйича ордер чиқарган эди.
Ушаков таъкидлашича, BRICS саммитида Россия номидан Ташқи ишлар вазири Сергей Лавров иштирок этади, чунки у XJS томонидан ҳибсга олишга доир ҳеч қандай талаб остида эмас.
Россия томони Бразилия ҳукумати Путиннинг хавфсиз иштирокини кафолатлай олмаганини билдирган. Ушаковнинг сўзларига кўра, айнан шу сабабдан президент саммитга бормасликка қарор қилган.
