Японияда тўққиз кишини ўлдирган “Twitter қотили” қатл этилди

Японияда 2017 йилда тўққиз кишини ваҳшийларча ўлдирган Такаҳиро Шираиши қатл этилди. Бу мамлакатда 2022 йилдан буён ижро этилган илк ўлим жазоси бўлиб, Шираиши кенг жамоатчиликка “Twitter қотили” номи билан танилган эди. BBC хабарига кўра, Шираишининг жиноятлари бутун мамлакатни ларзага келтирган.

 

У ўша пайтда 30 ёшда бўлиб, Twitter (ҳозирда Х) орқали асосан 15 ёшдан 26 ёшгача бўлган, ўз жонига қасд қилишга мойил бўлган ёш аёллар билан танишиб, уларни алдаб квартирасига олиб борган. У ерда уларни бўғиб ўлдирган ва жасадларини бўлакларга ажратган. Полиция 2017 йил октябрида Токионинг Зама шаҳридаги квартирасида жасад қисмларини топган. Шираиши ўз қурбонларига ўлишларига ёрдам беришини айтган ва баъзилари билан ўзини ҳам ўлдиришни режалаштирганини билдирган.

 

Суд жараёнида Шираишининг адвокатлари уларни қурбонларнинг розилиги билан ўлдирганини даъво қилиб, жазо енгиллаштирилишини сўрашган. Аммо Шираиши бу фикрларни рад этиб, уларни ҳеч қандай розиликсиз ўлдирганини тан олган. Натижада, 2020 йил декабрида у ўлим жазосига ҳукм қилинди. Суд мажлисини юзлаб одамлар кузатган ва бу иш Японияда оммавий муҳокамага сабаб бўлган.

 

Ушбу жиноятлар Twitter платформасининг сиёсатига ҳам таъсир кўрсатган. Эндиликда тармоқда ўз жонига қасд қилиш ёки ўзига зарар етказишни тарғиб қилиш қатъиян ман этилган. Шу тариқа, Шираишининг жиноятлари нафақат Японияни ларзага солди, балки интернет хавфсизлиги бўйича халқаро мунозараларга ҳам туртки берди.