Трамп Сурия санкцияларини бекор қилди
Бу ҳақда Оқ уй баёнот берди.
30 июнь куни АҚШ Президенти Доналд Трамп Сурияга қарши жорий этилган иқтисодий санкцияларни бекор қилиш тўғрисида фармон имзолади. Оқ уй бу қарорни “барқарорлик ва тинчлик сари йўлдаги қадам” дея баҳолади.
АҚШ баёнотига кўра, янги Сурия ҳукумати минтақавий хавфсизликни мустаҳкамлашга, диний ва этник озчиликлар хавфсизлигини таъминлашга ва Исроил билан муносабатларни яхшилашга интилмоқда.
Шу билан бирга, Россияга қочган собиқ президент Башар Асад, унинг оиласи ва аввалги тузум тарафдорларига нисбатан санкциялар кучда қолмоқда.
Суриянинг муваққат ҳукумати бу қарорни мамлакат иқтисодиётини тиклаш ва халқаро майдонга қайтиш йўлида ижобий ўзгариш деб атади. АҚШ Молия вазирига кўра, бу қарор Сурия халқига “янги ҳаёт” эшикларини очади.
