Украина дронлари Ижевскдаги корхонага ҳужум қилди
Ҳодиса оқибатида жароҳатланганлар бор.
Украина дронлари Ижевск шаҳридаги корхонага ҳужум қилди. Бу ҳақда Россиянинг Удмуртия Республикаси раҳбари Александр Бречалов хабар берди. У қайси корхона нишонга олингани ва қанча одам жароҳатланганига аниқлик киритмаган.
Украина Миллий хавфсизлик ва мудофаа кенгаши (СНБО) раҳбари Андрей Коваленкога кўра, дронлар Ижевскдаги “Купол” электротехника заводига зарба берган.
“Бу Россия армияси учун “Тор” зенит-ракета мажмуалари ва “Гарпия-А1” зарба дронларини ишлаб чиқарувчи асосий корхоналардан бири”, — дея таъкидлади Коваленко.
Астра нашрининг гувоҳларга таяниб ёзишича, ҳужум натижасида камида 9 киши жароҳат олган. Ижевск аэропорти фаолиятига вақтинчалик чекловлар жорий этилган.
