Марсга оид энг йирик метеорит Нью-Йоркда аукционга қўйилди
24,5 килограммли Марс метеоритининг нархи миллионлаб доллар бўлиши мумкин.
Ерда топилган Марс метеоритлари ичида энг йириги саналувчи NWA 16788 номли намунаси АҚШнинг Нью-Йорк шаҳридаги Sotheby’s аукционида сотувга қўйилди. Оғирлиги 24,5 килограмм бўлган ушбу метеорит ўзининг ўлчами ва рангидаги ўзига хослик билан ажралиб туради.
Метеорит 2023 йил ноябрь ойида Нигер Республикасининг Агадез минтақасидан топилган. Мутахассисларнинг таъкидлашича, бу ҳозиргача Ерда топилган барча Марс метеоритлари орасида энг каттаси ҳисобланади.
Илмий таҳлилларга кўра, бу бўлак Марс юзасидан кучли астероид зарбаси оқибатида ажралиб чиққан ва сайёралараро фазода узоқ вақт ҳаракатлангач, Ер атмосферасига кириб келган. Атмосферага кириш пайтида юзасида юқори ҳарорат таъсирида шиша қобиқ ҳосил бўлган. Унинг таркибида маскелйнит каби ноёб Марсга хос минераллар аниқланган.
Sotheby’s ушбу метеоритни “табиий тарихдаги энг ноёб артефактлардан бири” деб баҳолаб, уни коллекционерлар ва илмий доиралар учун юксак қадрга лойиқ объект сифатида тақдим этмоқда. Бошланғич нархи бир неча миллион доллар бўлиши кутилмоқда.
Шунга қарамай, айрим олимлар бу каби тарихий топилмаларнинг хусусий қўлларга эмас, музей ва илмий марказларга топширилиши кераклигини таъкидламоқда. Чунки улар нафақат илмий изланишлар, балки кенг жамоатчилик учун ҳам катта аҳамиятга эга.
