Сурияда мамлакат гербини ўзгартириш тўғрисида қарор қабул қилинди
Дамашқда тантанали тарзда янги герб намойиш қилинди.
Сурия ҳукумати мамлакатнинг расмий гербини янгилаш тўғрисида қарор қабул қилди. Янги гербда қанотларини ёйган ва бошида учта юлдуз акс эттирилган бургут тасвири жой олган. Бу ҳақда “al-Ikhbaria” телеканали хабар берди дейди oxu.az нашри.
Дамашқда бўлиб ўтган тантанали маросимда янгиланган давлат рамзи кенг жамоатчиликка тақдим этилди. Сурия Президенти номидан сўзга чиққан Аҳмед аш-Шара янги герб “халқнинг тарихида янги босқич бошланганини” ифодалайди, дея таъкидлади.
Унинг сўзларига кўра, бургут тасвири сурияликларнинг кучи, матонати ва қатъиятини рамзий тарзда ифодалайди. Уч юлдуз эса мамлакат келажагига бўлган умид ва бирликни англатади.
Эслатиб ўтамиз, аввалги гербда қалқон кўтариб турган бургут тасвири бўлиб, унда иккита юлдуз ва “Сурия Араб Республикаси” ёзуви туширилган лента мавжуд эди.
Янги гербнинг жорий этилиши мамлакат сиёсий ҳаётида муҳим босқич сифатида эътироф этилмоқда.
