Андижонда ҳоким ўринбосари, Тошкент вилоятида Пенсия жамғармаси бўлим бошлиғи қўлга олинди
ДХХ тезкор тадбирида 3 нафар мансабдорнинг жиноий қилмишлари фош этилди.
Ўзбекистоннинг бир нечта ҳудудларида давлат хизматчиларининг ноқонуний ҳаракатлари фош қилинди. Улар ер майдонларини ажратиш, ишлаб чиқариш учун рухсатлар бериш ва пенсияга чиқариш эвазига катта миқдорда пора олганликда гумонланмоқда.
Хонобод шаҳри: Шаҳар ҳокими ўринбосари ва илгари судланган МЧЖ раҳбари ўзаро тил бириктириб, маҳаллий тадбиркорга 4 гектар ер майдонини 2 млрд сўмга аукцион орқали расмийлаштириб бериш эвазига 20 минг АҚШ доллари пора олаётган вақтда ушланган.
Андижон тумани: Туман ҳокимининг собиқ ўринбосари, шаҳар статистика бўлими бошлиғи ва яна икки шахс “Ипак йўли” ЭИЗ ҳудудидан 6 гектар ер олиб бериш учун 600 минг АҚШ доллари талаб қилган. Уларга 150 минг доллар аванс тўланган пайтда қўлга олинган. Бу ишга илгари давлат лавозимида бўлган, ҳозирда хусусий бандлик агентлиги раҳбари ҳам алоқадорлиги аниқланган — у илгари 11 минг доллар олган.
Тошкент вилояти, Оҳангарон тумани: Пенсия жамғармаси бўлими раҳбари фуқаронинг йўқолган меҳнат дафтарчасини тиклаб, уни пенсияга чиқариб бериш эвазига 1500 АҚШ доллари пора олаётганида қўлга олинган. Эътиборлиси, у илгари Жиноят кодексининг 167-моддаси билан судланган бўлса-да, хулоса чиқармаган.
Мазкур ҳолатлар юзасидан жиноят ишлари қўзғатилиб, гумонланувчиларга нисбатан қамоқ эҳтиёт чораси қўлланилди. Тергов ҳаракатлари олиб борилмоқда.
