Бакалавр ва магистрлар учун давлат грантлари квоталари эълон қилинди
Президент фармойишига кўра 2025-2026 ўқув йилидан 3 йил учун грантлар миқдори белгиланди.
Ўзбекистон Президенти томонидан 2025 йил 18 июлда имзоланган ПФ–43-сон фармойишга мувофиқ, 2025/2026 ўқув йилидан бошлаб келгуси уч йил учун олий таълим муассасаларида давлат гранти асосида ўқиш имкониятлари аниқ белгиланди. Бу ҳақда Олий таълим, фан ва инновациялар вазирлиги хабар берди.
Кундузги бакалавриат босқичи учун 2025/2026 ўқув йилида 35 500 та давлат гранти ажратилади. Кейинги йилларда бу кўрсаткич ортиб боради: 2026/2027 йилда – 36 023 та, 2027/2028 йилда – 36 460 та, 2028/2029 ўқув йилида эса 36 761 та грант берилиши режалаштирилган.
Магистратура учун ҳам давлат гранти квоталари оширилмоқда. 2025/2026 йилда магистратурага 9 922 та грант, 2026/2027 йилда 10 191 та, 2027/2028 йилда 10 477 та, 2028/2029 йилда эса 10 784 та грант ажратилиши белгиланган.
Бундан ташқари, хорижий ва нодавлат ОТМлар учун 1 320 та, хорижда яшовчи ёш ватандошлар учун 30 та, аёллар учун эса 4 000 та алоҳида грант ажратилиши кўзда тутилган. Мазкур грантларнинг тақсимоти бўйича таклифлар Олий таълим, фан ва инновациялар вазирлиги томонидан Давлат комиссиясига тақдим этилади.
