Тошкентдан яна бир қатор масъуллар Ангренда зўравонликка учраган қиз олдига борди

Ангрен шаҳрида 15 ёшли вояга етмаган Y.S. исмли қиз билан боғлиқ ҳолат жамоатчиликда кенг муҳокамаларга сабаб бўлди. Ижтимоий ҳимоя миллий агентлиги ҳолат юзасидан расмий баёнот бериб, бола ёлғиз эмаслиги, давлат унинг ёнида эканини маълум қилди.

 

Агентлик ташаббуси билан ҳолат ўрганилди. Жараёнда ҳуқуқни муҳофаза қилувчи органлар, Бош прокуратура, Соғлиқни сақлаш вазирлиги ва васийлик органлари вакиллари иштирок этди. Оила аъзолари, шифокорлар ва психологлар билан суҳбатлар ўтказилиб, вазиятга ҳар томонлама баҳо берилди.

 

Мутахассислар тавсиясига биноан, Y.S. Тошкент шаҳридаги ихтисослаштирилган тиббий муассасага кўчирилди. Бу ерда етакчи мутахассислардан иборат шифокорлар консилиуми унинг даволаш режасини ишлаб чиқди. Шунингдек, қизнинг руҳий ҳолатига ҳам алоҳида эътибор қаратилиб, психологик ёрдам кўрсатилмоқда.

 

Агентлик қиз ва унинг оиласига тўлиқ соғайиш жараёнида ҳар томонлама ҳамроҳлик қилишини билдирди. Шу билан бирга, ушбу иш юзасидан тергов жараёни Бош прокуратура томонидан алоҳида назоратга олинган. Барча зарур процессуал ҳаракатлар давом этмоқда.

 

Эслатиб ўтамиз, аввалроқ Болалар омбудсмани Тошкент вилоятининг Ангрен шаҳрида бўлиб, жиноятдан жабрланган қиз билан учрашган ва вазиятни ўрганган эди.