Конибодомдаги қотилликлар иши бўйича тўрт киши умрбод қамоқ жазосига ҳукм қилинди
2024 йилда 7 оиланинг 23 аъзоси ваҳшийларча ўлдирилгани бўйича суд ҳукми эълон қилинди.
Тожикистоннинг Конибодом шаҳрида юз берган даҳшатли қотилликлар иши бўйича тўрт нафар шахс умрбод озодликдан маҳрум этилди. Бу ҳақда Даврон Зохидзода журналистлар билан учрашувда маълум қилди.
Зохидзоданинг сўзларига кўра, Конибодом ва унга яқин ҳудудларда содир бўлган кўплаб одам ўлими бўйича тўрт нафар шахсга нисбатан умрбод қамоқ жазоси тайинланган. Бироқ у ҳукм қачон чиқарилгани ва суд тафсилотлари ҳақида аниқлик киритмаган.
Олдинроқ берилган маълумотларга кўра, 2024 йилнинг март ойидан декабрь ойигача бўлган даврда 7 та оиладан жами 23 киши шафқатсизларча ўлдирилган.
28–29 март кунлари бир оиладан 5 киши, 16–17 апрель кунлари 2 киши, 28–29 май кунлари эса иккита оиладан 6 киши ўлдирилган. Декабрь ойида яна иккита даҳшатли ҳолат рўй берган: 8–9 декабрь кунлари 6 киши, 15–16 декабрь кунлари эса яна иккита оиладан 4 киши ваҳшийларча ўлдирилган. Жабрланганлар орасида болалар, қариялар ва турли ёшдаги аёллар ҳам бўлган.
Баъзи ҳолатларда гумонланувчиларнинг яқинлари уларнинг айбсизлигини даъво қилиб, ишни қайта кўриб чиқишни талаб қилган.
Бу воқеалар жамоатчилик орасида кенг таҳлика уйғотган. Одамлар кечалари маҳаллаларда навбатчилик қилиб, хавфсизликни таъминлашга ҳаракат қилганлар.
